domingo, 14 de xaneiro de 2018

Estruturas da natureza

E outro fermoso padlet do alumnado de debuxo, desta vez a inspiración é a natureza: liña, proporcións, claroscuro, e gamas de cor para confeccionar un herbario de plantas aromáticas.

Hecho con Padlet

martes, 9 de xaneiro de 2018

Feliz aninovo... Sentados.

Retomamos as clases, con renovadas enerxías e desexando a todos un feliz e proveitoso 2018. Queremos que vexades o moito que nos esforzamos durante trimestre pasado: velaí o traballo do alumnado de 2º de bacharelato arredor da mirada, da memoria, da luz e da sombra.

Hecho con Padlet

venres, 22 de decembro de 2017

Despedindo o trimestre con ledicia e moita música!


Onte rematamos por fin o trimestre. Despedímolo todos xuntos no noso claustro cunha actividade moi especial dentro do proxecto de musicoterapia no que estamos participando: " A música, pulso&matriz. Saúde na educación".



A continuación, como fin de festa, as panxoliñas e o "chiculate" deron paso á ledicia de comezar as vacacións.

Moi felices festas a todas e todos!

mércores, 20 de decembro de 2017

O noso mosteiro emociona: Mosteiro oblicuo

Impresionante o que dá de si o noso claustro visto cos ollos do alumnado de debuxo! A perspectiva cónica quedoulles clarísima, e os resultados, espectaculares...! Entrade, entrade no padlet!

Hecho con Padlet

venres, 8 de decembro de 2017

VIII Xornadas de Bibliotecas Escolares de Galicia: Aprender a pensar coa biblioteca escolar



E alí estivemos. Como cada ano o IES Celanova Celso Emilio Ferreiro estivo representado por varios membros do seu equipo de biblioteca, que asistiron os días 1 e 2 de decembro a estas xornadas formativas que tiveron como fío condutor o pensamento.

Deixámosvos aquí o programa, que como veredes tivo moitas e variadas ponencias, experiencias de centro e comunicacións. Máis información aquí.

Ata o ano que ven!




xoves, 30 de novembro de 2017

Visitamos Porto e Aveiro!

E como non vale parar, aquí vos deixamos a bitácora da viaxe a Porto e Aveiro polo noso corresponsal de 1º Bacharelato Eduardo Vilachá... e unhas fotiños para dar envexa...

    "Unha quinta feira, o 26 de outubro de 2017, embarcámonos á excursión de Porto alumnado de 1.º e 2.° de Bacharelato e uns poucos de FPB 1, mais a compañía de dous profesores, Rafael e Leopoldo. A viaxe de aproximadamente 3 horas, fíxose curta grazas ao incrible acompañamento destes cursos e máis a dos profesores.

    Ao chegar ao hotel (o Hotel Nave) deixamos as cousas para achegarnos ao centro da cidade de Porto e gozar dalgúns dos seus encantos: a estación de São Bento ou a avenida dos Aliados onde se atopa o edificio do concello. Despois disto tivemos tempo para descansar, ir de compras e visitar outros lugares independentemente. Ás cinco da tarde reunímonos de novo todos os membros da excursión xa que tiñamos planificada a visita guiada ao Palácio da Bolsa. Nunha palabra, impresionante. Ao Palácio non lle faltaba detalle, contiña un gran patio interior, distintas salas con diferentes decorados entre as que encontramos unha sala xudicial, unha con motivos árabes e varias de escritorios. Ao acabar a visita volvéronnos deixar tempo libre, onde algúns de nós o empregamos para ir a famosa Livraria Lello e Irmão. De seguido, demos un paseo polas rúas e ceamos. Cansos de tanto trote, a iso das doce da noite collemos o metro para dirixirnos ó hotel a descansar.

    O seguinte día, espertamos cedo para acudir ao Museu dos Descobrimentos, onde nos explicaron as técnicas navais, as conquistas de Portugal e como vivían os escravos e mais os piratas nos distintos navíos que había naquela época: nau, caravela, carraca, galeão etc . Pola tarde, despois de comer, demos unha volta polas beiras do río Douro, cruzamos a famosa ponte Don Luís I, camiñamos por distintas rúas do centro, ata que, sobre as oito da tarde, collemos novamente o metro dirección “Alameda Shopping” (un centro comercial) onde ceamos. Acto seguido fomos ver unha película ao cinema. Ao rematar volvemos ao hotel para durmir.

    O terceiro e último día, levantámonos máis pronto ca o día anterior para visitar diferentes cidades de Portugal. A primeira foi a de Aveiro, na que acompañados polas explicacións dun guía realizamos un percorrido nun moliceiro polo río Vouga que atravesa a localidade de Aveiro. E onde compramos un doce típico os Ovos moles de Aveiro. Despois disto fomos visitar libremente a cidade e xantamos. A seguinte parada que fixemos despois de Aveiro foi Braga e despois de outras tres horas de viaxe puxemos fin a esta magnifica excursión chegado a Celanova.

Eduardo Vilachá Martínez
1.ºBach A

                                                                                                                              Moliceiros en Aveiro


 Porto, 26 de outubro de 2017


Palácio da Bolsa Palácio da Bolsa Livraría Lello&IrmaoFoto de grupo en Porto

luns, 27 de novembro de 2017

Proxecto lector e outras herbas...

Para os que vos fagades un lío co tema dos proxectos lectores, plans de lectura e outros conceptos liosos para quen non está familiarizado con eles, alá vai esta presentación que aclara conceptos e tamén describe o noso xeito de traballar... que, non é por nada, pero pensamos que é ben xeitoso!